国际米兰即将出战欧联决赛，前锋拿达路马天尼斯喺大战前先办喜事，佢喺意大利科莫湖举行盛大婚礼，同女友Agustina Gandolfo拉埋天窗。今次婚礼星光熠熠，除咗卢卡古等国米队友出席外，一班阿根廷世盃冠军功臣亦齐齐到贺，场面热闹。

据报拿达路马天尼斯同Agustina Gandolfo喺今个月中已秘密注册，周二(30日)先至补办盛大庆祝派对，唔少球圈老友都有份出席，其中一张阿根廷国脚大合照就喺网上疯传，达米安马天尼斯、达利亚费高、鲁利、安素费南迪斯同阿历斯麦亚里士打都带埋另一半出席，加埋尼高拉斯干沙利斯同祖亚昆哥利亚，呢张阿根廷大合照份量十足。

拿达路马天尼斯同Agustina Gandolfo依家有一个2岁囡囡，而且准备迎接儿子Theo诞生，如果佢可以继世盃冠军後，再帮国际米兰拎埋欧联冠军，就真系家庭事业两得意啦！