今届欧霸盃决赛将於6月1日凌晨开波，西维尔对罗马，盛传一旦罗马失冠，教练摩连奴就会立即辞职，就算捧盃，亦未必留任，所以今仗好大机会成为呢位60岁葡萄牙名帅嘅告别战。

根据意大利媒体爆料，罗马确定无缘意甲前4位之後，摩连奴已经决定今夏离队，由於佢将於意甲煞科战对史柏斯亚停赛，意味今仗欧霸盃好可能成为佢最後一次亲自率领罗马比赛。

虽然如果罗马赢得欧霸盃冠军，亦可以参加下届欧联，但摩连奴考虑到自己执教2年以来，球队始终无力挑战意甲锦标，由於罗马冇财力收购星级猛将，预料下季亦难以喺联赛取得突破，更加唔好话要问鼎欧联锦标，所以「寸王」希望提早1年解约。

其实摩连奴想离开罗马，好大程度上由於受到巴黎圣日耳门(PSG)垂青，一直有传呢支法甲冠军计划邀请佢执教，由於PSG财力雄厚，可以斥巨资畀「寸王」增兵争夺欧联锦标，对於摩帅有好大吸引力。

至於摩连奴离开罗马前，可唔可以带领球队夺得欧霸盃冠军，留下美好回忆，大家拭目以待。