意甲豪门祖云达斯因为「造假帐」，被扣联赛10分，导致无缘下届欧联，令阵中唔少主力有离心，其中迪马利亚无意同球会续约，今夏好大机会自由身走人。祖记失去欧联大水喉，财政实力受削，将放弃买断2位借将里安度柏利迪斯及米利克。

协助阿根廷夺得上年世界盃冠军嘅迪马利亚将於6月底约满，据悉呢位35岁翼锋考虑自己年纪唔细，唔想浪费时间，希望转投一支欧联份子，继续参加呢项大赛，所以唔打算同祖记续约。

盛传巴塞隆拿计划邀请迪马利亚加盟，绰号「天使」嘅迪马利亚曾於2010至14年效力皇马，对於西甲绝不陌生，由於巴塞计划签番美斯，2位阿根廷国家队好拍档有望喺巴塞合作。

至於同样有份为阿根廷捧世界冠嘅中场里安度柏利迪斯，情况比较唔同，佢本身属於借用性质，由於表现欠佳，祖记准备将佢还番畀巴黎圣日耳门。

前锋米利克同样将於今夏借用期届满，祖记无意用700万欧元(约5,860万港元)买断呢位29岁波兰国脚，意味佢将重返马赛。