罗马失落欧霸盃锦标，摩连奴保持嘅欧洲赛决赛100%捧盃纪录断缆，赛後「寸王」狠批球证执法不公，愤而将亚军奖牌掟畀球迷。盛传呢位60岁葡萄牙名帅将於今夏离队，佢依家表示，如果会方愿意开出合适条件，佢肯继续留队执教。

罗马今仗原本有机会绝杀西维尔，踢到81分钟，尼曼查马迪传中，省中禁区内西维尔球员手部，但球证安东尼泰莱并冇判12码，惹起罗马职球员强烈抗议。赛後摩连奴话：「今场赛果非常唔公平，所有情节都对我哋不利，球证好似系西班牙人咁，疯狂出示黄牌，西维尔中场拉美拿应该被逐。」摩连奴上台领取奖牌时，黑晒口面，其後将奖牌掟畀球迷，宣泄不满。

由於罗马下周一(5日)凌晨意甲煞科战主场对史柏斯亚，摩连奴需要停赛，盛传今场欧霸盃成为佢嘅「告别战」，并将会转投巴黎圣日耳门，但「寸王」透露不排除留队：「我想留喺罗马，但前提系要有合适条件令我可以有最佳发挥，我哋嘅球员值得拥有更多，我亦值得拥有更多。」相信摩连奴嘅意思系要求罗马今夏开水喉畀佢增兵，否则就会离队。