拿玻里今季重夺意甲冠军後，教练史巴列堤宣布功成身退离队，呢位64岁教头临走之前，竟然获拿玻里一班极端球迷送上别出心裁嘅告别礼──史巴列堤2年前被偷走嘅軚盘同CD！

话说史巴列堤喺2021年执教拿玻里，早前表现未获球迷肯定，当时有极端球迷组织抗议，走向破坏史巴列堤嘅车，拆走个軚盘兼偷走车内CD，并且拉横额威胁：「只要你离开，我哋就会还番畀你。」

时隔2年，史巴列堤终於决定离队，唔同嘅系佢已经成为球迷心目中嘅英雄，就喺佢嘅告别仪式，呢班极端球迷就用个箱装住当年嘅「贼赃」，正式还番畀史巴列堤，史巴列堤收到後亦开心到举高手庆祝，场面搞笑。

史巴列堤离开拿玻里後，将会休息1年唔教波，至於拿玻里仍然物色新帅人选，据报西班牙籍嘅安历基被视为大热人选。