西甲劲旅皇家马德里周四(15日)宣布，以1.15亿镑(约11.4亿港元)转会费收购英格兰中场祖迪比宁咸，令佢成为史上最高转会费英格兰球员。有趣嘅系，祖迪比宁咸嘅弟弟祖比，亦喺皇马官宣前几个钟头，由伯明翰转投新特兰，两兄弟同日齐齐转会。

现年17岁嘅祖比比宁咸，同19岁嘅哥哥祖迪比宁咸一样系伯明翰出道，而且同样非常早熟，啱啱嗰季有22次英冠上阵纪录，今次获新特兰用150万镑(约1,485万港元)收购，等佢踢完英格兰U18国家队赛事後，就会正式签约。

祖比比宁咸表示：「好开心可以签约新特兰，对一个年轻球员嚟讲系好好嘅机会，我认为新特兰系帮助我成长嘅完美球会。」新特兰喺22/23球季排英冠第6位，可惜喺升班附加赛4强出局，祖比比宁咸将有机会协助「黑猫」再挑战英超席位。