即将带领克罗地亚出战欧国联决赛嘅莫迪历，未来1个星期会迎嚟足球生涯交叉点，据报呢位37岁老将喺决赛後，将慎重考虑结束国际赛生涯，而佢下周就会返西班牙同皇家马德里会长皮里兹会面，决定续约皇马定系去沙特阿拉伯搵食。

莫迪历喺上年世盃率克罗地亚拎季军後，表明会坚持踢埋欧国联，希望为国家队历史性赢得锦标，依家距离捧盃梦想只差1步，据西班牙传媒报道，莫迪历会喺欧国联决赛後决定前途，最希望系用冠军嚟为国家队生涯划上完美句号。

莫迪历嘅球会生涯同样要作出抉择，佢同皇马嘅合约夏天完结，虽然佢多次强调希望留队，但续约迟迟未落实，早前更接获沙特阿拉伯豪门嘅丰厚合约，令续约再现变数。《马卡报》指莫迪历下周会同皇马会长皮里兹等高层见面，为去留作出最後决定。