周一(19日)凌晨欧国联王者战，西班牙同克罗地亚激战120分钟踢成0比0平手，互射12码亦斗到突然死亡阶段，最终西班牙凭门将乌尼西蒙2次成功扑救，射赢5比4勇夺冠军。今次系西班牙首次称霸欧国联，亦系佢哋自2012年欧国盃夺冠後，相隔11年再赢大赛冠军。

西班牙今场贯彻控球踢法，不过埋门把握力仍然偏低，加维早段曾有射门仅仅斜出，「狂牛兵团」全场一共录得19次攻门，但要到84分钟先由安素法迪完成唯一一次中目标射门。两队踢到加时仍然拉锯，最後要用残酷嘅互射12码定出冠军。

双方头3轮都命中，乌尼西蒙喺第4轮用脚挡出克罗地亚中场路夫路马查射门，但去到决胜嘅第5轮，西班牙中坚拿朴迪竟然射中楣，要进入突然死亡阶段；乌尼西蒙再做好戏，先勇救般奴柏高域施射，之後丹尼尔卡华积射入致胜12码，助西班牙勇夺冠军。

世盃後上任嘅领队富安迪，曾分别带领西班牙U19同U21赢欧国盃冠军，依家执教大国脚又拎埋欧国联冠军，中场加维赛後表示：「好开心西班牙夺冠，多谢领队嘅信任，我哋系一支年轻球队，呢个冠军非常重要，可以令大家继续相信年轻球员。」

西班牙今次冠军阵容有唔少新星，包括18岁嘅加维、20岁嘅安素法迪、20岁嘅耶利米宾奴同24岁嘅苏比文迪等等，富安迪亦表明未来会引入更多年轻球员，有望慢慢卷起「青春风暴」。