热刺新门将人选落实！据转会权威Fabrizio Romano报道，热刺已同安玻里达成协议，将会以1,900万欧元(约1.6亿港元)收购意大利门神古里莫维卡里奥，呢位意大利国脚喺22/23球季表现出色，受到唔少豪门垂青。不过意大利门将喺英超向来发展麻麻，维卡里奥可唔可以打破魔咒拭目以待。

法国门将洛里斯宣布离开热刺後，新帅普斯迪高路一直物色替补人选，原本首要目标大衞拉耶已经倾掂个人条件，但宾福特叫价4,000万镑(约4亿港元)转会费令交易拉倒。热刺随即转斟维卡里奥，并同安玻里火速达成协议，26岁嘅维卡里奥去伦敦完成体测後，会签约至2028年。

维卡里奥已入选意大利国家队，但仍未有机会正式上阵，虽然佢嘅身手获得肯定，不过有球迷担心意大利门将喺英超嘅「宿命」，过往泰比(曼联)、施连尼(叶士域治)、维维安奴(阿仙奴)、高连尼(热刺)等意大利门将，都系喺意甲有好表现而失意英超，前车路士门将古迪仙尼系少数可以喺英超立足嘅意国门将。