欧洲球季休季期间，唔少球星都把握空档同另一半拉埋天窗，车路士门将阿列沙巴拿加(Kepa)周二(26日)就举行婚礼，不过典礼同时成为车路士「散水宴」，事关有份到贺嘅车仔队友夏维斯、高华锡，据报都会喺日内转会离队，Kepa可以趁呢次婚宴同老友道别。

28岁嘅Kepa同女伴Andrea Martinez，选择喺西班牙嘅马尔韦利亚举行婚礼，被影到出席嘅球星除咗依家车路士队友夏维斯、高华锡外，仲有前车仔球员佐真奴同艾华路莫拉达，不过2位车仔球星夏维斯、高华锡都准备转会，高华锡将会加盟曼城，而夏维斯就会过档阿仙奴，佢同「未来队友」佐真奴更率先喺婚礼合照，提前同阿仙奴球迷打招呼。

至於阿列沙巴拿加据报将会继续留效车路士，消息指车仔新帅普捷天奴对佢嘅能力有信心，尤其艾度亚文迪被卖走後，阿列沙巴拿加嘅正选位置更加稳阵。