欧联冠军曼城周二(28日)宣布，成功向车路士签入克罗地亚中场高华锡，据报今次转会费用达3,000万镑(约3亿港元)，呢位29岁中场已签约4年并会着起8号波衫，佢喺访问入面兴奋表示：「我加盟咗全世界最佳球会！」

据报曼城向车路士支付2,500万镑(约2.5亿港元)转会费，外加500万镑(约5,000万港元)奖金条款，高华锡表示：「呢次转会对我嚟讲非常之好，有睇过哥迪奥拿呢队波嘅人都知曼城有几劲，我认为曼城系世界最佳球会，能够加入系所有球员嘅梦想，我认为喺哥迪奥拿领导下，我仍然可以继续进步。」

曼城总监碧格列斯坦表示，高华锡可以出任「6号」同「8号」两个中场位置，对曼城嚟讲非常有用。曼城喺失去约满嘅根度简後，依家正积极物色新兵，传闻佢哋亦想收购韦斯咸中场迪格兰赖斯，正同阿仙奴展开争夺战。