西班牙门将迪基亚同曼联嘅合约已经完结，双方仍然未就续约达成协议，好可能会结束佢喺曼联12年生涯。虽然迪基亚近年有唔少失误，但有曼联球迷「反转猪肚」，竟然剪辑一套长达1小时49分钟嘅「派胶电影」，收录迪基亚12年来嘅虾碌片段，认真唔畀面。

呢套影片叫《迪基亚：骗子》，制作嘅曼联球迷Eriks Butcher喺网上发布後，仲抵死发出「家长指引」，指影片内容可能唔适合长期受苦嘅曼联球迷观看，影片入面收录迪基亚解围失误、扑救甩手、企错位、交失波等等派胶画面。

不过，呢套抽水影片就得唔到普遍球迷支持，大批网民批评制作者应该尊重呢位曾经为曼联付出12年嘅球员，亦有网民指制作者「可怜」，竟然花咁多时间去剪辑一段接近2个钟、用嚟羞辱人嘅影片。