●卢顿重返英超 「民居主场」先抢Fo

卢顿新一季进军英超，虽然未知表现系点，但佢哋嘅「民居球场」率先成为焦点，事关球场正门入口只系两道蓝色铁门，球迷入场前仲要先穿过附近民居嘅後巷，相当有特色。其实世界各地仲有好多特色球场，各位球迷有兴趣嘅话，下次旅行不妨造访一吓。

●两座世界遗产中间文化气息重

克罗地亚近两届世盃分别获得亚军及季军，成绩好之余更加带动当地旅游业，吸引唔少球迷「朝圣」。讲到克罗地亚球场代表，就要数恩加利斯特巴达利查球场（Igraliste Batarija）。

呢个球场系克罗地亚非联赛球队托基亚嘅主场，虽然大约只有1,000个座位，但佢位处两座联合国世界遗产司库城堡同圣马可中间，充满欧洲中世纪文化气息。因此去呢个球场已经唔系睇波咁简单，简直系一次历史文化穿梭之旅。

●全球最靓景观球坛世外桃源

位於挪威罗弗敦群岛嘅Henningsvaer球场，虽然冇任何先进设备，甚至连观众席都欠奉，但因为天然嘅四面环海超靓景色，同得天独厚嘅纯朴气息，成为足球界中嘅「世外桃园」，连国际足协都曾经专登介绍畀球迷认识。

Henningsvaer球场并唔属於任何球会，佢由一个得500人嘅小渔村村民合力兴建，畀村内小朋友踢波，呢个小岛球场同陆地唯一通道，只系一条1983年兴建嘅小石桥，正正由於「与世隔绝」，先令呢个球场不食人间烟火，被誉为「世界最靓足球场」。

●「绿色鳄鱼」外形够霸气

「鳄鱼球场」Timash Arena位於土耳其第4大城市布尔萨，系土耳其球队贝沙主场。贝沙别名「绿色鳄鱼」，所以当佢哋2015年翻新主场时，将球场整到成条鳄鱼咁，入口系鳄鱼嘅血盆大口，单睇外形真系霸气十足。

不过呢个可容纳44,000人嘅球场可能「煞气」过重，自球场启用後贝沙成绩严重倒退，依家更降到落土乙。今年3月欧国外土耳其亦喺呢个球场迎战克罗地亚，结果输0比2。

●2,000米山上全欧海拔最高场地

希斯菲特球场座落於瑞士瓦莱州嘅Gspon小山村，亦系业余球队GS Gspon主场，球场位处2,000米高嘅山上，属全欧洲海拔最高球场，除坐缆车外，冇任何交通工具上到去。

希斯菲特球场最多只可容纳200名观众，亦比一般球场细，只踢不设越位嘅8人赛。2008年举行过欧洲山村足球锦标赛，1年後前拜仁慕尼黑及瑞士国家队主帅希斯菲特，赞助呢个球场嘅人造草皮，因而改名，同时由於高海拔空气稀薄，被认为有利主队。

●全球最大浮动球场变搞演唱会

2007年启用嘅新加坡滨海湾浮动体育场，又称为滨海湾浮动舞台，由15个钢制浮台组成，可容纳30,000人，位於新加坡滨海湾蓄水池，面积比新加坡国家体育场大5%，属全球最大浮动球场。球场曾经计划为新加坡国家队专属主场，但最终搁置，之後主要举办演唱会，亦系一级方程式赛车第17同18弯嘅一部分。不过体育场现正进行拆卸重建工程，将改建为永久建筑物。

●购物中心天台入场要先搭??

塞尔维亚超联球队禾杜域有个同名球场，又名「购物中心球场」。球场原址本身都系一个叫Dejan Majic嘅球场，1912年已经用紧，直至2010年拆卸重建。禾杜域球场位处一座购物中心4楼天台，难怪有球迷讲笑话去呢度睇波，要搭??是常识吧！呢个球场亦系塞尔维亚超联首个及唯一一个人造草场，球场离地24米。虽然得5,174个座位，但规格通过欧洲足协规定，可上演欧洲赛事。

●隔篱住宅大厦街坊随时食波饼

华历简奴主场特里萨里维罗球场，系另一个欧洲着名嘅「民居球场」，位於马德里南部Vallecas社区中间，呢度系以工人阶级为主嘅住宅社区。球场早於1924年已经喺度，之前试过四面环楼，经过多年重建後，都系只得三面看台，其中一边龙门後边系一块高墙，後面就系马路同两幢住宅。

旧年11月，皇马联赛作客2比3不敌华历简奴，其中费达历高华维迪喺一次角球攻势，禁区顶边走边射，点知个波炒到去球场後面嘅民居入面，要居民帮手入屋执番个波，场面搞笑。