利物浦周一(3日)宣布，匈牙利中场苏保斯拉尔正式签约加盟，「红军」会分5年向RB莱比锡支付6,000万镑(约6亿港元)转会费，呢位22岁球星将会着起8号波衫，苏保斯拉尔更自爆手臂上纹有利物浦传奇谢拉特嘅金句，拣着8号都系受呢位传奇影响。

苏保斯拉尔接受利物浦官网访问话：「利物浦系一间有历史嘅球会，有好好嘅球员、教练、球场、球迷，总之乜嘢都好好，系好适合我行下一步嘅完美球会。」被问到点解会着8号，苏保斯拉尔表示：「我手上有谢拉特讲嘢嘅纹身，呢个就系原因！细个我唔系睇好多波，但当我睇欧联，谢拉特就系当中最伟大球员之一。」

据报佢嘅纹身系谢拉特金句：「天赋系上天畀你嘅祝福，但如果缺乏无比嘅斗志同谦逊，一切都变得冇价值。」苏保斯拉尔系利物浦今个夏天第2个收购，「红军」早前已向白礼顿签入阿根廷中场阿历斯麦亚里士打。