美职近日风云人物，当然系加盟国际迈亚密嘅阿根廷「球王」美斯，但其实同美斯一齐亮相嘅，仲有西班牙名将布斯基斯，可怜佢喺美斯嘅光芒之下，只能成为典礼嘅「活动布景板」，就连美职官方twitter都搞错，将另一位西班牙球员艾比路亚当做布斯基斯！

当所有球迷焦点放晒喺美斯身上，赢过世盃、欧国盃、欧联(3次)同西甲(9次)嘅布斯基斯，加盟国际迈亚密後亦要做大配角。美职官方twitter介绍布斯基斯嘅辉煌成就嗰阵，竟然用咗一张艾比路亚锡世盃冠军嘅相片，尴尬场面即时被网民指出错处。

美职官方twitter被踢爆後打圆场，贴出布斯基斯锡世盃冠军奖盃嘅相片同艾比路亚做对比，留言：「点解布斯基斯同艾比路亚喺呢度咁似样？管理员要换过一副新眼镜...」盛传国际迈亚密即将签入另一西班牙球星佐迪艾巴，有网民温馨提示：「记得检查下佐迪艾巴个预设帖有冇落错相呀！」