曾经效力曼联嘅意大利前锋基奥斯比罗斯宣布挂靴，结束19年职业球员生涯，呢位射手原本天才横溢，但因为经常受伤，事业大受打击，近年睇波多过踢波，最终决定黯然退役。

现年36岁嘅基奥斯比罗斯出身於曼联青年军，其後辗转加盟维拉利尔，为呢支西甲球队上阵192场入82球，原本发展唔错，但其後多次受重伤，严重影响发挥，成为「人球」先後效力过费伦天拿、利云特、切尔达、热拿亚，甚至去美职搵食，加盟皇家盐湖城，但表现都令人失望。

罗斯仔2年前开始已处於半退休状态，大部份时间担任足球评述员，期间曾经短暂效力意乙球队史帕尔，但今夏已约满离队，佢喺社交网发表千字文，感谢各界支持，虽然自己仍然好热爱足球，但已到咗离开嘅时候。