卢卡古同车路士、国际米兰、祖云达斯三间球会嘅闹剧似乎告一段落，据《罗马体育报》最新消息，呢名30岁中锋已经同「斑马兵团」达成个人协议，年薪为900万欧元，双方签约3年。

卢卡古上季由车路士外借去国际米兰，各项赛事37场入14球，原本佢决定继续降薪留效，而国米方面都准备求购；不过卢卡古早前却突然变心，私下同另一支意甲球队祖云达斯接触，佢甚至仲玩失踪，唔听所有国米队友、高层电话，最终国米决定放弃斟介。而根据《罗马体育报》报道，卢卡古同祖记已经完成个人协议，只差转会费未同车路士达成共识。

不过「斑马兵团」嘅球迷似乎唔太欢迎卢卡古，一班球迷早前更加聚集喺球会医疗中心门外，高呼「我哋唔想要卢卡古！」。另外，如果祖记要签卢卡古嘅话，就要先卖咗阵中前锋杜辛华荷域，清空球队薪酬，相信呢单转会短期内难以成事。