希拉尔出到7亿欧元(约60亿港元)年薪邀请巴黎圣日耳门(PSG)前锋基利安麦巴比加盟，但仍然被呢位法国国脚拒绝，西班牙《世界体育报》爆料，希拉尔转移目标，再次斟介巴塞隆拿射手罗拔利云度夫斯基，并且容许呢位34岁波兰国脚明夏先至正式加盟。

由於麦巴比决心等明夏约满，以自由身转投皇马，对於希拉尔开出嘅肥约，唔感兴趣，呢支沙特劲旅仍然未放弃签入欧洲星级射手，准备第2次邀请「罗拔佬」加盟。据悉希拉尔之前已经邀请过罗拔利云度夫斯基加盟，但佢声称仍然有约在身，作出婉拒，希拉尔现时愿意让步，等多佢一年，争取同「罗拔佬」达成口头协议，明夏来投。

罗拔利云度夫斯基同巴塞嘅合约将於2025年夏天约满，估计呢支西甲劲旅未必会同佢续约，可能明夏就出售佢，以免人财两失，所以明夏无疑系希拉尔签入「罗拔佬」最佳时机。