以破英超转会费纪录加盟车路士嘅摩西斯卡些度，啱啱加盟即刻做咗车路士过去20年冇人做过嘅事，着起「蓝战士」嘅25号球衣。呢个号码对上一次喺车路士出现，已经系意大利传奇前锋苏拿，佢今次做「25」仔前，更专程向苏拿提出申请，并获呢位传奇送上祝福。

自意大利名将苏拿2003年离队，车路士件25号波衫一直冇人着过，不过喺白礼顿已经系「25」仔嘅佢，转会後仍想保留号码，佢就表示：「好荣幸可以着车路士25号，我有问过苏拿，佢亦向我送上祝福。我知呢个号码嘅意义，25对我同我屋企人都系一个好特别嘅号码。」

苏拿亦公开回应卡些度嘅要求：「多谢卡些度嘅讯息，我希望呢个号码带畀你嘅欢乐，可以同佢带畀我一样咁多，祝你好运！」车路士周日(20日)作客韦斯咸，如无意外会系卡些度首演。