西班牙女足周日(20日)勇夺女子世盃冠军，喺决赛一箭定江山嘅卡蒙娜，享受足球生涯最大喜悦之际，西班牙足总赛後就发声明，证实卡蒙娜嘅爸爸喺上周五(18日)因病离世，卡蒙娜家人为免影响佢备战决赛，所以隐瞒消息至决赛之後，闻者心酸。

23岁嘅卡蒙娜成为世盃冠军功臣，捧盃後如常唱歌、跳舞兼亲吻奖盃，佢入波後更展示底衫上「Merchi」字句，献畀佢好朋友去世嘅妈妈，但佢唔知道原来自己爸爸喺决赛前已过身。西班牙足总声明话：「我哋悲痛宣布卡蒙娜嘅爸爸已过身，卡蒙娜决赛後得悉呢个噩耗，我哋向佢哋一家送上最真诚慰问。卡蒙娜，我哋爱你，你已经被载入西班牙嘅史册。」

据西班牙传媒报道，卡蒙娜爸爸系系上周五离世，不过屋企人唔想卡蒙娜被呢个消息影响决赛备战，所以专登唔同佢讲，卡蒙娜妈妈同兄弟都有飞新西兰睇西班牙女足嘅分组赛，之後赶返西班牙处理卡蒙娜爸爸事情，周日再飞去澳洲睇决赛。