周一(21日)凌晨西甲，巴塞隆拿主场围攻卡迪斯，但要去到完场前先由根度简靓助攻打开缺口，最终赢2比0拎到今季首场胜仗。巴塞教练沙维大赞球队「执到宝」，直指根度简系赢波嘅锁匙人。

巴塞今场用只有16岁38日大嘅耶马担正，令佢成为西甲史上最年轻正选上阵球员，不过巴塞虽然有77%控球率，对住「泊大巴」嘅卡迪斯仍一筹莫展。直到82分钟，根度简禁区顶巧妙「挑传」，入楔嘅柏迪门前赶到射入；巴塞领先後乘客队空群进攻，补时再由费伦托利斯单刀埋斋，赢2比0完场。

巴塞继开咧战被基达菲闷和，今场几乎再次失分，沙维赛後大赞根度简系救世主：「根度简系呢队波嘅基石，佢拥有巴塞DNA，佢永远唔会失去控球权，用正确决定去改变比赛，呢个就系我哋决定签佢嘅原因！」