今夏继续疯狂买人嘅车路士，周一(21日)凌晨英超作客1比3输畀韦斯咸，新球季开咧2场不胜只得1分。由2位「1亿镑先生」组成嘅最贵中场今仗连环自爆，安素费南迪斯射失关键12码，摩西斯卡些度首演更送对手一个12码，成为「蓝战士」输波两大罪人。

车路士开咧战1比1打和利物浦，今场除受伤嘅列斯占士之外原阵出战，不过7分钟就顶唔住韦斯咸角球攻势，被阿古特头槌顶入；车路士29分钟还以颜色，卓克禾美卡左路突破射远柱追成1比1。完场半场车路士再博到12码，但安素费南迪斯主射被捉路扑出，埋下输波伏线。

换边後车路士继续抢攻，但攻不锐守不稳，米查利安东尼奥53分钟硬爆车仔防线後轰入。车路士随後换入「英超史上最贵球员」摩西斯卡些度，韦斯咸67分钟再有阿古特2黄1红被逐，正当踢多个嘅车仔发动狂攻，摩西斯卡些度竟喺禁区内鲁莽犯规输12码，韦斯咸由卢卡斯柏基达射入赢3比1完场。

上任後首尝败仗嘅领队普捷天奴赛後表示：「球队表现、作战态度都好好，当然我关心成绩问题，但我宁愿咁样开局，都唔想踢得差嚟赢波，因为依家嘅表现系球队未来发展嘅基础，只要维持呢种质素，入球同胜仗系迟早问题。」