根据「转会权威」记者罗曼诺(Fabrizio Romano)爆料，意甲劲旅罗马派出高层前往伦敦同车路士方面商讨借用前锋卢卡古嘅事宜，教练摩连奴表示，会方准备签入2位前锋，睇来「寸王」有可能继执教车路士及曼联之後，再次同卢卡古合作。

据悉罗马只系想用卢卡古1季，并唔会加入买断条款，至於车路士要求对方支付一笔借用费，并负责呢位比利时国脚借用期间嘅全部薪酬，卢卡古周薪高达32.5万镑(约320万港元)，罗马希望只负担一半人工，成为交易一大分歧。

由於罗马前锋谭美阿巴谦受重伤长抖半年，急需要签入前锋，教练摩连奴被问到借用卢卡古一事，佢话：「会方同我讲过，等签入阿斯蒙(伊朗国脚)之後，会再签多1位前锋，我当然高兴，但阿斯蒙仲未签约，我好难评论，卢卡古都系，佢仍然属於车路士球员。」

卢卡古现时只能同车路士U21操练，领队普捷天奴摆明唔会起用佢，加上转投国际米兰、祖云达斯无望，佢亦唔想去沙特阿拉伯搵食，加盟罗马再次跟随摩连奴，可能系佢最佳出路。