英格兰足球水平向来系「英伦三岛」入面嘅大哥，不过近年苏格兰愈战愈勇，喺新一届欧国联甚至成为唯一喺A级联赛角逐嘅英伦球队。苏格兰「上位」後反攻英格兰，据报正挖角「三狮遗珠」哈维班尼斯加盟，希望明年欧国盃可以代表苏格兰出赛。

25岁嘅哈维班尼斯今夏转投纽卡素，佢3年前曾经为英格兰喺热身赛上阵，但之後就冇再入选，由於佢祖父母系苏格兰籍，所以有资格选择代表苏格兰出赛。据英国《泰晤士报》报道，哈维班尼斯已知悉苏格兰领队奇勒对佢嘅赏识，对「转会」抱开放态度，如果苏格兰落实拎到欧国盃入场券，哈维班尼斯会愿意加入。

苏格兰喺欧国外A组5战全胜，抛离第3名球队多达11分，出线决赛周机会高唱入云。事实上苏格兰近期不断吸纳英格兰球员，诺域治门将安格斯根恩原本踢英格兰U21，转踢苏格兰後已成为国家队1号门将；苏格兰今次点兵首次入选嘅纽卡素小将艾利洛安达臣，之前亦系代表英格兰U19国家队。