法甲球队里昂正式宣布同教练白兰斯解约，结束双方唔够1年嘅宾主关系，由於前车路士主帅朴达已经拒绝里昂邀请，法国媒体《Footmercato》指意大利「硬汉」加度素好大机会成为里昂新主帅。

现年57岁嘅白兰斯球员生涯捧过英超、世界盃及欧国盃冠军，转为教练之後，亦曾率领波尔多及巴黎圣日耳门赢得法甲等多项锦标。呢位法国名帅上年10月临危授命执教里昂，获得上季联赛第7位，今季成绩急转直下，踢4场联赛仅1和3负排榜尾，会方决定「斩缆」同佢解约。

里昂原本有意搵朴达接替白兰斯，但呢位48岁英格兰少帅拒绝去收拾烂摊子，加度素成为新帅热门，呢位45岁意大利名宿曾经执教AC米兰、拿玻里、华伦西亚等球队，但成绩欠佳，今年1月被华伦西亚炒鱿之後，一直未有教职，可以即时上任。不过，以加度素过往履历，恐怕未必拯救到里昂。