英格兰国脚艾云东尼因违规赌波，被足总重罚停赛8个月，不过同样「赌出祸」嘅诺定咸森林球员哈利托夫路，承认375条违规赌波罪名後，周三(13日)被判罚停赛5个月，但系就可以缓刑至24/25球季结束，呢位28岁守将亦顺利入选森林提交嘅英超25人大军名单。

哈利托夫路今次面对嘅375条违规赌波控罪，涉及嘅3年时间都系效力佢出道球会诺域治，足总独立调查委员会决定罚佢停赛5个月兼罚款约2万镑(约20万港元)，但停赛令就缓刑至24/25球季结束。哈利托夫路承认嘅控罪，比之前宾福特前锋艾云东尼承认嘅控罪多出超过100条，但艾云东尼就被罚停赛8个月兼即时执行。

哈利托夫路上年由哈特斯菲尔德加盟诺定咸森林，上季曾上阵19场联赛，今季暂时踢过1场英联盃赛事，但喺英超仍未上阵。随住哈利托夫路今季唔使停赛，诺定咸森林亦将佢列入英超25人大军名单。