曼联2位翼锋查顿辛祖、安东尼马菲奥斯分别因为「顶撞主帅」、「家暴」被打入冷宫後，恐怕短期内难以上阵，右翼位置出现真空，令今夏几乎被外借去出嘅法根度柏利斯查突然有上位机会，呢位21岁乌拉圭小将可能成为红魔鬼救星。

由於拉舒福特、加拿祖踢惯左翼，加上以往可以任右翼嘅艾兰加、格连活特已经离队，除非安排般奴费南迪斯踢右路，否则法根度柏利斯查成为右翼唯一选择。呢位新星3年前由彭拿路加盟曼联之後，大部份时间被外借去西甲球队艾拉维斯，上月亦几乎再次被外借，但佢最终决定留队，认为自己有能力争取上阵机会。

事实上，法根度柏利斯查喺季前热身赛有唔错表现，对毕尔包一役更射入1球，佢喺上月英超对狼队及热刺，都有後备上阵，并有份为乌拉圭出战日前世界盃外围赛对厄瓜多尔，状态不俗。

同埋法根度柏利斯查属於传统右脚右翼球员，有别於安东尼马菲尔奥斯往往要扣入中路，同左脚射门，如果柏利斯查担正，或者可以为曼联带来新踢法。