今轮英超、西甲联赛，日、韩球星表现非常抢镜，南韩前锋孙兴民梅开二度，协助热刺2比2逼和阿仙奴，日本翼锋三笘薰亦唔执输，佢半场上阵即做「救世主」，连入2球率白礼顿主场3比1反胜般尼茅夫；另一日本新星久保建英亦喺西甲入波，助皇家苏斯达4比3击败基达菲。

南韩球星孙兴民喺北伦敦打吡入2球光芒四射，成为热刺英超史上首个喺阿仙奴主场单场入2球球员；另一场嘅三笘薰亦为日本争光，白礼顿主场对般尼茅夫上半场踢成1比1，三笘薰半场上阵救驾，落场15秒就高速杀入禁区射成2比1，77分钟再喺门前入楔顶入，连轰2球助白礼顿赢3比1。

白礼顿官网赛後以「三笘薰魔法」形容佢今场表现，今场犯错累球队先失嘅门将云布根赛後表示：「我嘅错误令球队失球，但过去嘅事已过去，最重要系下场做好啲。三笘薰系一个好出色嘅球员，我好庆幸佢系我嘅队友。」

除咗英超日、韩双星发威之外，效力皇家苏斯达嘅久保建英亦延续今季强势，周日(24日)主场对基达菲一仗开波2分钟就窄角度熨射远柱入波，协助球队戏剧性4比3赢波，呢位22岁中场今季6场联赛，已交出4个入波同1次助攻。