南美自由盃4强首回合上演焦点对决，由小保加主场迎战彭美拉斯。小保加今非昔比，出战自由盃淘汰赛分外保守，彭美拉斯一向防守硬净，作客场合唔敢冒进，1.5球入球细值得捧场。（周五早上8时30分开赛）

阿根廷班霸小保加过往曾6夺自由盃，系夺冠次数第2多嘅球队，不过上次捧盃已经系2007年嘅事，喺2012年同2018年杀入决赛但屈居亚军，实力持续下滑。小保加虽然有前曼联射手卡云尼助阵，但呢位老将无复当年勇，加盟後各项赛事入得1球咁大把，惟有加强防守，佢哋今届16强对蒙特维多国民队及8强对竞赛会，合共4仗法定时间未赢过，全部打和兼仅入2粒，而且呢2圈最终都系靠互射12码涉险过关，反映出佢哋踢淘汰赛相当保守。

今届自由盃4强有3支系来自巴甲，虽然彭美拉斯只曾3次捧盃，但其中2次系2020年同2021年连夺两届，证明佢哋近年出战自由盃特醒。彭美拉斯以防守硬净见称，近5仗自由盃全部保持清白之身，包括淘汰赛对住明尼路同佩雷拉都冇失波，不过佢哋近期战绩回落，各项赛事近5仗只获2胜，主因系攻力下滑兼仅入2球，全开1球或以下，加上今仗客场出击，更加唔敢轻举妄动，唔慌多波入。