曼联喺欧联2比3不敌加拉塔沙雷，近7场赛事第5次输波，领队坦哈格嘅帅位岌岌可危，尤其曼联连续2场主场喺奥脱福球场嘘声中离开，就同苏斯克查当年被炒前嘅场面非常接近。坦哈格赛後回应炒鱿传闻，佢就表明球队上下，包括管理层都团结一心，似乎未为帅位忧心。

连同上场输畀水晶宫，曼联已连续2仗主场输波，对上一次主场2连败系2021年10月至11月，亦系苏斯克查执教嘅最後2场主场比赛，当年曼联系输畀曼城同利物浦2大劲旅，苏斯克查都要食「无情鸡」，今次曼联连输畀水晶宫同加拉塔沙雷，难免被传出面临炒鱿。

对於帅位不保传闻，坦哈格赛後话：「上季我哋非常出色，超乎大家嘅预期，但我哋知道呢个计划系会有高低起伏，球队永远都系团结面对，包括我、总监同埋球队上下所有人，大家都齐心奋斗。」曼联星期六(7日)会喺英超主场对宾福特，要避免主场3连败。