曼联翼锋查顿辛祖同领队坦哈格决裂之後，离队已成定局，根据英国《太阳报》最新消息，意甲劲旅祖云达斯计划明年1月冬季转会市场重开後，向红魔鬼借用呢位23岁英格兰国脚，但要求曼联负担一半人工，摆明「趁火打劫」。

查顿辛祖近年状态低迷，加上周薪高达35万镑(约335万港元)，曼联要搵买家接货，并唔容易。据悉祖云达斯提出先借後买方式签入辛祖，借用半季之後，如果表现符合要求，就会喺明夏以6,000万镑(约5.7亿港元)买断佢。不过，前提系曼联必须喺外借期间，负担查顿辛祖一半人工。

曼联2年前用7,300万镑(约7亿港元)向多蒙特收购查顿辛祖，签约4年，但佢表现远差过预期，甚至出现心理问题，如果曼联可以6,000万镑出售佢止蚀，都系一个唔错选择，唔排除会接受祖记先借後买要求。

另外，祖云达斯喺周日(8日)凌晨意甲「都灵打吡」，凭中坚加迪、前锋米利克下半场各入1球，主场以2比0击败拖连奴。