AC米兰周日(8日)意甲绝杀热拿亚，法国前锋基奥特尾段客串守龙门，救出关键一球成为球坛热话。AC米兰认真识玩，食住呢个热潮搵银，喺官方网站将基奥特列为守门员，而且仲会推出基奥特嘅9号龙门衫做限时特卖！

基奥特神救展示全能实力後，AC米兰官网将基奥特由前锋移摆去龙门行列，而且阵中嘅「证件相」亦用咗基奥特着龙门衫嘅相片。AC米兰官网表示：「基奥特充满勇气嘅防守为球会创造历史，为庆祝佢嘅精彩表现，官网决定将佢加入门将行列。」

除咗庆祝基奥特嘅神勇，背後最大原因当然系搵钱，AC米兰同时宣布：「未来几日之内，球迷可以喺AC米兰官方商店购买基奥特9号龙门衫。」基奥特喺对热拿亚赛後表示，细个时曾经想做龙门，估唔到有机会喺足球生涯尾声一尝心愿。