2023年金球奖颁奖礼，将於周二凌晨(31日)在法国巴黎举行，各大主要传媒，以及「转会专家」罗曼诺都爆料，美斯将会第8次得奖，但正式「官宣」却系美斯嘅发型师利维拉，佢喺社交网话已经帮美斯恤个靓头，然後去攞金球奖。

利维拉喺IG上载美斯合照，刚刚帮美斯恤个靓头，其留言等同官宣美斯得奖：「为G.O.A.T美斯准备大日子，佢将会第8次获得金球奖。美斯，多谢你对我嘅信任，畀我修剪呢个咁重要嘅发型，到时全世界都会睇到。」

大会公布，颁奖礼将於周二凌晨3时45分开始节目，颁发8个奖项，计有男、女子金球奖，男、女子年度最佳球会、最佳新人、最佳门将、最佳射手同最佳社会贡献奖。美斯将获金球奖，西班牙女足国脚邦玛迪获女子金球奖，祖迪比宁咸获最佳新人奖。

主办单位《法国足球》主编云逊加西亚否认得奖名单提前外泄，佢话呢啲只系「传闻」同传媒嘅游戏，但好少人知道真相，不过佢特别讲到C朗：「我哋根本冇讨论过C朗缺席嘅问题，佢喺世界盃踢得曳，又喺一个可见度有限嘅联赛(沙特)效力，虽然系咁，佢仍然系一位伟大球员。」

今年金球奖可能系「美C时代」嘅终结，下年开始会由新一代球员竞逐，云逊加西亚提到祖迪比宁咸：「佢令人印象深刻，如果佢喺皇马继续有好表现，再喺英格兰打出成绩，将会系新一代金球奖有力竞争者。」