车路士上轮KO热刺，打破对方联赛不败之身，纯粹睇比分好似好大差距，但事实车仔成场表现只属一般。赛後领队普捷天奴盛赞球队踢出部署，导致对手犯错全取3分，但如果唔系热刺球员又伤又红牌嘅话，最後结局又会变成点呢？

不过之前畀人话名过於实嘅尼高拉斯积逊，上场连中三元完场後情绪激动，睇嚟之前一路嘅心理包袱应该可放低，之後入波可以陆续有嚟。

至於佢哋今仗对手曼城，已喺各项赛事5连胜，仲要狂轰17球，比利时国脚谢利美杜古上轮联赛对住般尼茅夫，助攻都做到大四喜，极速融入球队，真系要赞下主帅哥迪奥拿嘅眼光。加上两军之前6次对赛，曼城全部赢晒仲要不失一球，即使要喺史丹福桥作战，都可以秤先少少。