虽然葡萄牙国脚鲁宾尼维斯已转战沙特联赛，但近期成为抢手货，继纽卡素想借佢救亡後，连阿仙奴都加入战团，呢位前狼队中场真系皇帝女唔忧嫁。

纽卡素早前已经放风，想喺冬窗从希拉尔借入26岁嘅鲁宾尼维斯帮手，但因拥有「喜鹊」嘅沙特主权财富基金(PIF)，同时系希拉尔话事人，有「左手交右手」之嫌，英超本月将举行一次投票，禁止「同老板球会互相借用球员」条例，预料除纽卡素外，其余19队会一致通过，阿仙奴就想趁机截胡。

据报阿仙奴总监伊度一直都对鲁宾尼维斯流晒口水，只系今夏敌唔过希拉尔嘅银弹攻势，再讲远啲早喺2016年，当时阿仙奴嘅主帅云格已经对鲁宾尼维斯有兴趣，仲特登派人去葡萄牙考察佢，如今「兵工厂」中场汤马士柏迪成日受伤，令领队阿迪达失去耐性，希望冬窗期间搵个有英超经验嘅中场悍将取代佢，正值当打之年嘅鲁宾尼维斯，绝对系最佳人选。