周三(3日)凌晨英超大战，韦斯咸同白礼顿两支实力份子交锋，结果两队都有进攻主力缺阵下，以0比0握手言和。呢个0比0结果相当罕见，系韦斯咸5年几以来首次联赛主场0比0，对上一次已经数到2018年9月(对车路士)，同时亦只系今季英超第5场0比0赛事。

韦斯咸翼锋古达斯离队踢非国盃，白礼顿亦有日本翼锋三笘薰养伤。作客嘅白礼顿表现更佳，全场有22次攻门，可惜柏斯高哥斯、积及莫达、拉尔拉拿等射门，都逃唔过韦斯咸门神艾路拿嘅十指关，最终两队闷和0比0。韦斯咸失分後继续排第6位，白礼顿就喺第7位。

韦斯咸领队莫耶斯赛後对赛程安排表示不满，因为今仗为迁就电视直播而延後，令佢哋失去代表加纳踢非国盃嘅古达斯，相反早1日踢嘅利物浦，仍然可以起用埃及前锋穆罕默德沙拿：「点解我哋唔可以踢先，等非洲球员可以踢埋先离队？点解我哋唔可以同其他球队一样？我觉得唔妥罗！」