因伤缺阵近5个月嘅奇云迪布尼，周日(7日)英足盃第3圈终於复出，呢位比利时中场後备上阵，只系用17分钟时间就交出靓助攻，协助曼城主场5比0大炒哈特斯菲尔德。曼城领队哥迪奥拿赛後表示，奇云迪布尼系球坛少数嘅「赢波锁匙」。

曼城拎完世冠盃後全面回勇，今仗主场对英冠球队更加予取予携，上半场由菲尔科顿同祖利安艾华利斯入波；57分钟奇云迪布尼久保复出，1分钟对手即摆乌龙，加上菲尔科顿喺65分钟攻入个人第2球拉开纪录。表现活跃嘅奇云迪布尼74分钟交出靓助攻，底线传中畀谢利美杜古抽入，曼城大胜5比0晋级。

哥迪奥拿赛後对奇云迪布尼大赞有加：「我哋非常兴奋见到佢复出，奇云迪布尼可以帮球队获胜，呢个世界有少数球员做到，奇云迪布尼、艾宁夏兰特呢啲球员系赢波锁匙。」曼城捧世冠盃後，返英国取得3连胜，下仗会喺14号联赛作客纽卡素。