罗马日前宣布炒摩连奴，搵嚟球会传奇迪罗斯接手，不过佢上任後即面临财政问题，据报罗马需要喺6月30日前「扑水」6,000万欧元(约5.1亿港元)，否则会面临欧洲足协处分，卖人成为最直接嘅出路，冬季转会窗完结前随时被逼放走主力。

意大利媒体《Il Tempo》报道，罗马几年前同欧洲足协签定财务协议，需要每年履行财务保证，上季佢哋几经辛苦下筹到3,000万欧元成功达标，但今季要喺6月30日前搵6,000万欧元，而且球会正经历高层变动，令经营更加混乱。据报罗马好可能要卖走球员，谭美阿巴谦、罗伦素柏历坚尼、白赖仁基斯坦迪，以至合约内有买断条款嘅保罗戴巴拿都可能会被出售。

迪罗斯周三(18日)带领罗马完成首次操练後，对执教罗马仍充满期待：「我认为罗马系一支强队，有好多好球员，就算劲旅都会有困难嘅时候，我以前效力罗马都经历过，我深信呢班球员有能力重返正轨，唔需要罗马畀咩保证我，只需要畀机会我。」