沙特阿拉伯豪门伊蒂法克今季成绩低迷，日前喺沙特盃被次级联赛球队踢出局後，盛传领队谢拉特将会被炒鱿，伊蒂法克球迷亦纷纷表示支持，批评谢拉特做教练系「一无是处」。

谢拉特执教伊蒂法克16个月，虽然有穆沙迪比利、韦拿杜姆等球星，不过成绩麻麻，目前联赛只排第10位，盃赛又被低组别球队淘汰，沙特媒体指伊蒂法克考虑解雇呢位年薪达1,520万镑嘅领队。

沙特电视台评论员、球迷齐齐炮轰谢拉特，其中有网上被热传留言指：「我由2001年开始支持伊蒂法克，谢拉特肯定系最差教练，冇战术、冇激励、乜都冇，就连记者会都做唔好，我想知佢当年喺维拉点生存？」

谢拉特早前喺记者会自爆，佢会更改伊蒂法克练波时间，方便佢睇利物浦比赛直播，言论引嚟各界炮轰。谢拉特2年前教维拉几乎降班而被炒鱿，维拉之後聘请艾美利，依家已经喺欧联排榜首，表现脱胎换骨。