曼城近期状态跌落谷底，连续6场赛事不胜，喺欧联领先飞燕诺3球都赢唔到，领队哥迪奥拿陷入执教生涯最大危机。哥帅喺对飞燕诺赛後，被影到个光头出现多条抓痕，鼻哥更加被抓损流血，佢被记者问到嗰阵竟语出惊人：我想自残！

曼城喺最後15分钟被飞燕诺狂追3球，哥迪奥拿喺场边睇到劲紧张，疑似肉紧过头整伤自己，赛後受访嗰阵明显满头伤痕，有记者问到点解会受伤，哥迪奥拿笑笑口咁解释：「系我只手指、我嘅指甲......我想伤害自己。」

有记者想安慰哥帅话：「一切都会OK」，不过哥迪奥拿讲完已经起身走人。相比起曼城依家嘅「受伤」，相信哥迪奥拿更加希望球队表现「OK」，佢哋下周一(2日)凌晨就要喺英超作客利物浦，想保住争冠希望系不容有失。