曼城近期一直沉沦，输畀阿士东维拉後，近12场比赛输咗9场，而喺最近嘅3连败入面，前锋艾宁夏兰特唔单止冇波入，就连射波、交波都近乎冇贡献，呢位挪威射手赛後亦主动揽责，表示曼城输波「系我嘅错」。

曼城最近连续输畀祖云达斯、曼联同阿士东维拉，夏兰特喺呢3场比赛踢足270分钟，不过就交出0入波、0助攻、0扭波、0关键传送数据，3场加埋只得1次中目标射门，而且合共只完成19次传球，平均每场只传6脚波，近乎隐形。

夏兰特赛後自责：「首先我要检讨自己，我踢得唔好，关键时刻我入唔到波，我哋控制唔到比赛、赢唔到波，我需要更加努力，所有嘢都要改善。」不过领队哥迪奥拿就回应：「我唔同意夏兰特，如果曼城冇咗佢会更惨，不过我锺意球员有呢种态度，亦系球队唯一走出低谷嘅方法。」