曼联成绩差劲，看守领队兰历克嘅威信亦不断下跌，日前佢公开表示法国中场保罗普巴受伤提早「收咧」，而且佢合约季尾完结，意味佢唔会再为曼联上阵。不过保罗普巴喺曼联对阿仙奴期间，突然喺社交网发文反驳，话自己仲有机会喺季尾前复出，曼联生涯「未完」。

曼联作客阿仙奴比赛期间，保罗普巴喺社交网发文：「好难过唔能够落场帮助球队，我会更加努力去争取复出，希望喺球季完结之前回归，一切都未完结！多谢大家嘅支持，曼联加油！」保罗普巴强调「未完」，明显系反击兰历克「玩完」嘅讲法。

曾效力车路士、阿仙奴同热刺嘅法国名将加拿斯，日前批评保罗普巴唔啱踢英超：「要喺英超生存好困难，比赛密度同强度需要坚强嘅意志，保罗普巴嘅意志唔够强大，所以唔可以有稳定表现，呢个球坛冇几多支球队可以签佢，可能巴黎圣日耳门系唯一选择。」