C朗拿度再救驾！周五(29日)凌晨英超大战，曼联凭C朗轰入靓波，主场以1比1逼和车路士，虽然避免3连败厄运，但「红魔鬼」再失2分後，依家落後第4位嘅阿仙奴5分兼踢多2场，争入前4名机会非常渺茫。曼联近1个半月拎到嘅9个入波，8球都系由C朗包办，几乎独力撑住「红魔鬼」。

近况低迷嘅曼联今仗喺奥脱福出击，仍被车路士控制战局，门将迪基亚上半场多次化险为夷，成为半场顶住0比0嘅最大原因。车路士喺60分钟打破僵局，马高斯阿朗素接应夏维斯头槌二传，窄位狂抽远柱入网；曼联2分钟後还以颜色，C朗接应尼曼查马迪妙传，用高超技术控定後再窝利抽入。车路士尾段有列斯占士射中柱，最终双方1比1握手言和。

曼联自3月中开始，8场比赛只系攻入9球，当中8球由C朗攻入，呢位前锋今季英超已累积17球，成为英超史上首个以37岁高龄入17球球员。另外，今次系C朗英超生涯第1次攻破车路士大门，喺C朗面对过嘅34支英超球队当中，只有狼队、水晶宫、锡菲联、列斯联、李斯特城同宾福特未畀佢入过波，而宾福特同水晶宫都系曼联最後3轮对手之一。

曼联目前以55分排第6位，就算最後3轮全胜，总积分亦只有64分，最多都系同莫耶斯13/14球季成绩睇齐。欧联竞逐方面，佢哋要寄望第4位嘅阿仙奴喺余下5轮，赢唔到多过1场，先有一丝机会争取来季欧联资格，前景不容乐观。