继签入苏格兰「神童」宾杜克後，利物浦近日再接近从鸭巴甸签入18岁右闸卡云蓝斯，据闻「红军」更即将以300万英镑，争赢列斯联等球队，抢签呢位苏格兰年度最佳新人奖得主。

18岁嘅卡云蓝斯出身自苏超球队鸭巴甸，今季获得好多机会，为母会共上阵33场并交出9次助攻，以一位右闸嚟讲助攻能力非常出众。今季佢更加获苏格兰足球记者协会，选为年度最佳年青球员，随即引起唔少英超球会关注。虽然年纪轻轻就获奖，但佢早前受访就表现得好谦卑：「上一队、希望有一日转去大球会，一定系年轻球员梦寐以求嘅事，我要继续学习同保持冷静，唔能够冲昏头脑。」

据英国《太阳报》报道，列斯联曾派人考察过佢，而利物浦领队高普亦对佢好有兴趣，打算以300万英镑将佢收归旗下，将佢改造成第2位阿历山大阿诺特。卡云蓝斯续指：「我仲好年轻，而且今季只系我嘅第一季，所以我要尝试建立更多，同给予自己更多信心。」