曼城同利物浦近年竞争激烈，2大名帅哥迪奥拿同高普亦惺惺相惜，多次大赞对方嘅施压令自己不断进步。随住高普早前续约利物浦到2026年，英国传媒指哥迪奥拿亦答应同曼城续约，如果双方都继续带队，球迷仲可以睇多4年「巅峰对决」。

哥迪奥拿同曼城合约原本喺2023年完结，英国《太阳报》报道，曼城已成功说服哥帅续约至2025年，而且仲有延长合约1年嘅附加条款。消息指哥迪奥拿续约，系球队收购艾宁夏兰特计划嘅关键，而签入艾宁夏兰特令曼城嘅长远发展得到保证，亦系哥迪奥拿答应继续执教嘅原因。

高普早前续约後，哥迪奥拿被问到会唔会跟随续约，佢当时表示：「唔会呀，老实讲我依家只系专注今季最後3个星期比赛，冇时间谂其他嘢。」据报曼城会等到今季完结，先公布哥迪奥拿续约嘅消息。