日前误传死讯嘅欧洲足球超级经理人拉奥拿，周六晚再传死讯，今次消息系由拉奥拿家人发布，喺佢twitter附有长文证实拉奥拿病逝，终年54岁。

拉奥拿系多位当今球坛巨星嘅经理人，计有保罗普巴、艾宁夏兰特、基安卢基当拿隆马、巴洛迪利等，今年一月佢喺意大利入院作身体检查後，连随被送入深切治疗部，报道指佢有肺部疾病，当时曾传过佢嘅死讯。

到日前网上再传出佢嘅死讯，多间传媒甚至皇家马德里官方都有报道及发文悼念，後来佢本人喺twitter发文澄清，仲话好多人想佢死，皇马亦将发文删除。

嚟到周六(30日)，今次系由佢家人喺佢twitter发文证实死讯，今次各大传媒都引用佢家人嘅讲法嚟报道佢已经病逝。