曼城同利物浦嘅英超争霸激烈，「蓝月亮」大胜纽卡素後形势大好，领队哥迪奥拿赛後亦忍唔住发炮，直指英格兰球迷同传媒都一面倒撑利物浦夺冠，并暗寸「红军」30年来只系拎过1次英超冠军。

哥迪奥拿表示：「大部份人想利物浦赢冠军多过曼城赢，呢个唔系问题亦好正常，或者利物浦喺全世界以及英格兰有更多支持者，英格兰每个人都想佢哋捧盃，因为佢哋喺欧洲赛有神奇嘅历史，但系讲到英超，利物浦近30年只系赢过1次。利物浦同曼联系名牌，因为佢哋历史上嘅锦标、传奇球员、经典赛事等等，不过曼城喺近12、13年已经追上嚟，我知道大家对曼城嘅冒起好唔舒服，但我唔在乎。」

自英超成立後，利物浦只系喺19/20球季赢过1次冠军，而曼城喺对上10季英超就5度封王；不过喺欧联方面，利物浦今个月将争取史上第7次冠军，系「红军」近18年第5次杀入决赛，但曼城就从未染指过欧联锦标。