英国《每日邮报》爆料，指曼联下季新领队坦哈格未上任，已经展现「魔鬼教练」煞气，据悉呢位荷兰名帅认为曼联球员体能状态严重不足，所以下令球员今夏提早2星期开操，即系6月20日就要归队训练，备战新球季，意味多位平时「玩惯叹惯」嘅球星抖暑时间大减，佢哋肯定晴天霹雳。

曼联原定7月4日开操备战新球季，但坦哈格认为有需要提早2星期开操，希望加强球员体能训练，今季英超将於5月22日煞科，意味曼联球员只有1个月暑假，就要喺6月20日归队。

据悉坦哈格之所以有呢个决定，主要原因系佢睇咗曼联近几场比赛片段之後，不满球员跑动表现，觉得球队今季成绩差，归根究底都系球员体能不足，加上坦哈格崇尚压逼踢法，要求球员保持全场时间奔跑同逼抢，因此佢执教红魔鬼之後首要工作，就系提升球员体能。

同埋曼联将於7月展开亚洲之旅，首站系7月12日喺泰国同利物浦踢热身赛，提早开操都有利球队备战。