列斯联喺英超煞科日作客2比1击败宾福特，成功压倒般尼保住英超席位，赛後全队上下大事庆祝，先开纪录嘅巴西前锋拉芬夏比洛尼，更加冲上看台同未婚妻Taia Rodrigues激吻。列斯联虽然成功护级，但领队马殊表示唔保证会留得住队中主力，拉芬夏就盛传会加盟巴塞隆拿。

马殊赛後表示：「我一直相信球队可以顺利护级，信念喺足球场上系好重要，我作为领袖更加要将佢传达，经过咁艰辛嘅时间，我哋要好好享受呢段假期。」对於阵中2大球星加云菲腊斯同拉芬夏嘅去留，马殊就话：「我唔可以作出保证，老实讲，我甚至冇问过关於佢哋嘅问题，我睇报纸知道嘅消息比我更多。」

早前有报道指，列斯联如果降班，拉芬夏合约中嘅2,500万欧元离队条款就会生效，依家条款虽然唔会启动，但有消息指拉芬夏同巴塞隆拿已就转会达成口头协议，2间球会将再作商讨。至於英格兰中场加云菲腊斯，一直系曼联嘅收购目标之一。