拜仁慕尼黑前锋罗拔利云度夫斯基，希望转投巴塞隆拿已经系公开嘅秘密，不过拜仁方面就多次强调唔会放人，「罗拔仔」经理人萨哈维日前就正式反面，炮轰拜仁阻止佢转会系缺乏尊重，直指「拜仁已经系罗拔利云度夫斯基嘅历史！」

罗拔利云度夫斯基同拜仁仲有最後1年合约，但续约一直冇进展，消息指呢位波兰前锋已决心加盟巴塞隆拿，经理人萨哈维就透过《图片报》开火：「罗拔过去8年为球队奉献一切，依家34岁，佢有机会实现人生中梦想嘅新挑战，点解拜仁要阻止佢？唔关金钱问题，罗拔过去几个月深深感受到拜仁对佢嘅唔尊重，拜仁冇失去到罗拔呢个球员，但就失去呢个人嘅心。」

萨哈维更透露，拜仁同佢讲如果「罗拔仔」想转会，买家至少要畀1.2亿欧元先有偈倾，萨哈维话：「冇错，罗拔仲有张到2023年嘅合约，拜仁有权勉强佢继续留队，但我建议佢哋唔好咁做，因为对罗拔嚟讲，拜仁已经系一段历史。」